سلام واهني هل الميدان بالشهر الكريم=وانته يابن زهران ياجعلك بخير وعافيه
انته تبى تغزي مع العتبان والا مع سليم=الحر يفهم بالاشاره والاشـاره كافيـه

يامرحبا والله غفـور ياصقـر والله رحيـم=وش كثر معك من الذنوب الظاهرة والخافية
العنصرية ياصقر راحت من العهـد القديـم=الله يديم الروس في ظـل البيـوت الدافيـة

اما الذنوب الله يعينك ما حد(ن)منها سليم=انته على قول المثل نيتك ماهي صافيـه
يعني تبى تبقى كذا لافي نعيم ولاجحيـم=نقول وش دورك تقول الشر ناره طافيه

مانته غريمي لا وصلنا للصراط المستقيم=يكفيك عن ذنب العمل ذنب الوزن والقافية
حنا مانبدي لين يغلي الدم فعروق الغريم=واللي نشوفة حرب حزبية ولعبة مافيـه

الله عطاك العقل لاتقعد تعلم من غشيـم=الله واكبر وين تلقى الحق والانصافيـه
اليا لزمك الصبر لين النار تالع فالهشيم=ماعاد لك فيها نصر تسفى عليها السافيه

ماني برب الهيم من جا وادي الهيما يهيم=ياكثر خوفي منك تترك خطـة العرافيـة
دام البلا من حفية الاقدام والشوكة تضيم=جلد النمر محد يحذي به قدمه الحافيـة

اللي يبا يخلف مواثيق العهود امه عقيم=خايف تصير ام المعارك قصة الصحافيه
واخيبة اللي يجلبون التمر عند اهل القصيم=الاوله والثانيه والثالثه متقافيه

بلغ معزبنا يبو تركي يكثـر فاليديـم=اما غدا والا عشا وخلاف ماش خلافية
لولا انتظار العيد مافصلت ثوب لليتيـم=ياعيد مانته عيد مادام العرب متجافية

يابو خليل اليا بغيت الصدق والله العظيـم=الوافيه ما يحتسيهـا غيـر راع الوافيـه
اليا برق برق الخيال وهب وذعذاع النسيم=الزمل تطرب للمساري والرقـاب عجافيـه

لاتشتكي كثر الضما مادمت عند الما مقيم=بعض العرب لا ما ولا شاهي ولانسكافية
حنا تعبنا مالقينا بشـت لقمـان الحكيـم=كل العرب قامت تفصل فالبشوت الضافية