ياللي يهمك فالزمن طيب معدنك=امش القدى واترك طريق العواجه

طريق دين الله يفكك من الظنك=نوراً مع الظلما يدلك سراجه

واختر صديق (ن)فالنوايب يعاونك=في ساعة الشدات يضحك حجاجه

تامن جنابه طول وقتك ويامنك=ويزيد مع زايد فرحك ابتهاجه

ماهيب خوت واحد(ن)همه البنك=لانافع (ن)نفسه ولاسد حاجه

وقت الرخاء يضحك مع ايسرك ويمنك=ويغيب ماتلقاه وقت المواجه

الياعطاك اليوم بكره يبا منك=لو مايبا ماعاطك مثل الخواجه

هذا صديق المصلحه جنبه عنك=لو لا المصالح ماصفالك مزاجه

وسوق النميمه لاتجي فيه يفتنك=ارفع مقامك لاتقف في حراجه